Domba Si Udin

Domba Si Udin

Si Udin boga Domba alus, di Majalaya aya Kontès Domba sèhat, hadiahna duit Rp. 300 rèbu.

Si Udin ngilu lomba. Alhamdulillah meunang kontès, hadiahna duit 300 rèbu.

Dibayar tunai ku Panitia, duitna 3 lambar 100,- rèbuan.

Waktu narima hadiah, bakat ku geumpeur, duitna anu 300 rèbu murag, langsung diteureuy ku Domba na.

Panitia nyarankeun yèn Domba na sina nginum kopi, terus ditepak-tepak bujurna, ngarah Domba na bisa utah, ambèh duit nu diteureuyna bisa kaluar.

Si udin balik bari nèangan tukang kopi, bari nunungtun si domba. Pas aya tukang kopi si Udin mesen sagelas kopi.

Ku si Udin kopi na diinumkeun ka si Domba saregot, terus ditepak-tepak bujurna.

Bener geuning kaluar salambar duit 100 rèbu!.

Tukang kopi jadi hèboh, langsung nawar 3 juta supaya Domba si Udin jadi milik manèhna.

Si Udin ngajawab singket;

"Teu dijual !"

Si Udin nginumkeun deui kopi, terus nepakkan bujur Domba na, kaluar deui duit 100 rebu...!!

Tukang kopi beuki panasaran, ditawar èta Domba si Udin tèh jadi 10 juta.

Si Udin keukeuh nampik bari nginumkeun deui kopi ka Domba na, ditepakkan deui bujur Domba na tèh, terus utah deui duit 100 rebu.

Tukang kopi beuki panasaran pisan..., tuluy nawaran duit 25 juta ka si Udin.

"Deal !"

Ceuk si Udin meni atoh..

Tungtungna si Domba tèh jadi milik si Tukang Kopi.

Isukna ramè aya berita dina headlinè koran;

"Tukang Kopi ditahan Pulisi ku sabab najongan Bujur Domba nepi ka paèh !".

Wilujeng seuri, lur...